O Proxecto 139 de Clece para a integración laboral de vítimas da violencia de xénero supera o 50 % das contratacións previstas nun ano
- A empresa participa na V carreira «Hai saída á violencia de xénero».
- Clece integra laboralmente 227 mulleres vítimas da violencia de xénero.
Madrid, 11 de xuño de 2018. Este domingo tivo lugar en Madrid a quinta edición da carreira «Hai saída á violencia de xénero» onde máis de 3500 persoas se congregaron co obxectivo de concienciar a sociedade e visibilizar tamén a través do deporte a loita contra o machismo e a violencia. Entre os miles de participantes, atopábase Clece, colaboradora desta iniciativa dende a súa primeira edición no marco do seu proxecto social dirixido á integración de colectivos vulnerables, como mulleres vítimas de violencia de xénero.
«A loita contra a violencia de xénero é unha carreira de fondo na que é necesaria a implicación de toda a sociedade». Ademais de iniciativas de sensibilización como a celebrada onte en Madrid, Clece orienta o seu labor con este colectivo ao ámbito da integración laboral. «O emprego é imprescindible para atopar a saída. Axuda a recuperar a autoestima e asegura a independencia económica destas mulleres. Non hai que esquecer que, en moitos casos, a dependencia económica co maltratador é un dos principais obstáculos. Ademais, estas mulleres adoitan facer fronte en solitario ao sostemento da súa familia. Atopar un emprego significa un punto á parte na súa vida» apuntou José Andrés Elizaga, director de Comunicación e Relacións Externas de Clece.
Dentro do ámbito da integración laboral, son xa 227 mulleres vítimas da violencia de xénero as que traballan actualmente en Clece. O número de contratacións experimentou un importante impulso no último ano despois de que a empresa emprendese o Proxecto 139, froito do compromiso acadado durante a celebración dos seus III Premios Compromiso. Durante estes galardóns, dedicados a recoñecer iniciativas destacadas na loita contra a violencia de xénero, xurdiu o compromiso de contratar 139 vítimas da violencia sexista, unha cifra simbólica igual ao número de candidaturas recibidas. O proxecto avanza favorablemente e son xa 87 as novas contratacións, máis da metade.
Clece forma parte do programa Rede de Empresas por unha Sociedade Libre de Violencia de Xénero que promove o Ministerio de Sanidade, Servizos Sociais e Igualdade e que ten como obxectivo sensibilizar a sociedade fronte a esta lacra, así como promover a inserción sociolaboral das vítimas. Clece recibiu o recoñecemento do Goberno en 2016 polo seu labor neste ámbito e foi tamén a única compañía convidada na ONU para presentar o seu modelo de integración de mulleres vítimas da violencia sexista.