Clece suma a súa voz ao clamor social contra a violencia de xénero
Clece Social, o proxecto social de Clece, uniuse á conmemoración do Día Internacional da Eliminación da Violencia contra a Muller coa realización de dúas campañas de sensibilización en que contou coa participación de clientes, empregados, colaboradores e usuarios dos seus servizos.
No terceiro ano que Clece realiza campaña específica para o 25 de novembro, foron dúas as iniciativas postas en marcha: por unha banda, a campaña «Non cales» en Andalucía e Canarias; por outra, no resto de delegacións déuselle continuidade a «Unha vida sen violencia, unha vida con respecto». Ambas as accións conseguiron a participación de máis de 45 000 persoas que alzaron a súa voz contra a violencia machista e mostraron o seu apoio ás vítimas.
«Un dos obxectivos do proxecto social é sensibilizar sobre a difícil realidade dos colectivos máis vulnerables, e as mulleres que sofren malos tratos son un dos grupos máis desprotexidos. Por iso, xa levamos tres anos promovendo esta campaña o 25 de novembro. Con todo, non queda só nunha data. O noso compromiso contra a violencia de xénero esténdese a todo o ano, cunha sensibilización continua, mais tamén a través da integración laboral das mulleres vítimas» afirmou José Andrés Elizaga, director de Comunicación de Clece.
Hospitais, escolas infantís, residencias de maiores, centros de traballo, oficinas e entidades públicas… Moi diversos foron os escenarios e moi repartidos na xeografía que fixeron súas as campañas de Clece realizando diversas actividades, como concentracións, obradoiros, charlas, murais, lonas e lazos, casetas informativas ou repartición de materiais.
Romper co silencio
Co lema «Non cales», a semana pasada sucedéronse distintas accións en Andalucía e Canarias. En Tenerife uníronse entidades como a Presidencia do Goberno de Canarias, o Hospital de La Candelaria ou o Centro Sanitario San Sebastián, en La Orotava; nas Palmas, o Hospital Materno Insular, o Hospital Negrín e o Servizo de Axuda no Domicilio municipal. Simbolizando que hai que acabar co silencio, algunhas das concentracións convocadas estiveron acompañadas polo son dos chifres, entre elas, as realizadas polos maiores do centro Acaymo en La Catedral de San Cristóbal de la Laguna ou polos propios traballadores da dirección xeral de Clece nas Canarias.
En Andalucía tamén tivo unha grande acollida. Os hospitais de Torrecárdenas, de La Inmaculada e de Poniente en Almería, e o de Puerta del Mar en Cádiz contaron con casetas informativas. Na Universidade de Málaga, distribuíronse máis de 3 000 autocolantes e 1 500 lentes, e colocouse un photocall para que todos puidesen «deixar a súa man» e escribir unha mensaxe. Noutros puntos, como a Residencia de Estudantes Andalucía e escolas infantís, impartíronse obradoiros sobre igualdade e prevención da violencia sexista a estudantes e profesionais. En Córdoba, participaron o pavillón municipal de deportes de Montilla e os servizos de axuda no domicilio de La Rambla, Doña Mencía, Torrecampo, Pozoblanco e Rute. No pavillón municipal de deportes de Montilla, os clubs da zona celebraron partidos de fútbol e baloncesto feminino en prol da igualdade e o rexeitamento á violencia de xénero. En Sevilla, «Non cales» chegou ao Parque Empresarial Torneo e á Facultade de Dereito onde Clece participou nas xornadas «Novas formas de violencia de xénero».
Unha vida sen violencia, unha vida con respecto
A campaña «Unha vida sen violencia, unha vida con respecto» estendeuse noutros moitos puntos da xeografía abranguendo un amplo programa de accións de sensibilización. Celebráronse xornadas en Barcelona en colaboración coa Fundación ARED quen explicou o seu programa «Integración sociolaboral de mulleres vítimas de violencia de xénero», e en Valencia xunto ao Hospital Xeral de Valencia en que reflexionaron sobre o papel dos homes na loita contra a violencia de xénero. No Hospital de Elda e o Hospital Xeral Universitario de Alacante repartiuse información e materiais da campaña.
Especialmente emotivas foron as actividades en que participaron nenos. Na Escola Municipal Globo de Valladolid realizaron a iniciativa «Plumas para a igualdade» con tres accións de sensibilización en colaboración coas familias e que contou coa asistencia da Concelleira de Educación, Infancia e Igualdade do Concello de Valladolid e a Asociación de Mulleres La Rondilla. Na Escola Infantil Municipal Fantasía de Huerta del Rey, convidouse un grupo de vítimas da violencia de xénero que representou con sombras chinesas o conto Rosa Caramelo.
Canto á implicación dos maiores, a residencia e centro de día de Atsobakar en Lasarte-Oria convidou os residentes, familiares e traballadores do centro ao centro cívico da muller e ao grupo «Ganchineando Estella» para elaborar cadros de 20×20 en punto e labor de gancho. A residencia de Venta de Baños celebrou un encontro interxeracional co alumnado de primaria do Colexio Sagrado Corazón da localidade palentina. En Murcia, a través do servizo de axuda no domicilio, organizouse unha concentración con lectura de manifesto na Praza do Concello.
Como non podía ser doutra maneira, os empregados de Clece tamén participaron activamente. En Barcelona, os empregados de Clece do Hospital Universitari Bellvitge, do Hospital Broggi, do Institut Català de la Salut e do Transporte Escolar Consell Comarcal luciron durante o día 24 petos brancos e lilas para visibilizar o problema. A maioría dos centros de traballo de Clece pararon uns instantes a súa actividade para facerse unha foto.
Froito dun compromiso
As mulleres vítimas da violencia sexista constitúen un dos colectivos en que se centra o proxecto social de Clece, Clece Social, e sobre o que a compañía está especialmente sensibilizada. Ademais de xestionar casas de acollida para a administración pública, Clece desenvolve iniciativas de concienciación como os Foros pola Integración, que se organizan en distintas comunidades autónomas para falar sobre os problemas deste colectivo, e está involucrada en proxectos institucionais tan importantes como «Hai saída». A compañía realiza tamén un esforzo pola integración laboral de persoas deste colectivo. Actualmente, máis de 180 mulleres que sufriron a violencia machista forman parte activa do cadro de persoal de Clece. O labor de apoio e integración das vítimas da violencia de xénero de Clece recibiu o recoñecemento de mans do presidente do Goberno en 2016 e foi tamén a única compañía convidada na ONU para presentar o seu modelo de integración de mulleres vítimas de violencia de xénero.