Clece-k iragarri ditu genero-indarkeriaren kontra nabarmendu diren ekimenentzako urteroko sariak

Clece-k iragarri ditu genero-indarkeriaren kontra nabarmendu diren ekimenentzako urteroko sariak

  • Hiru sari emango zaizkie emakumezko biktimak artatzen dituzten entitate sozialei, 10.000 bana euroko hornidurarekin, eta sari bat kazetaritza-lan onenari, 7.000 euroko sariarekin
  • IV. edizioak bi kategoria berri ditu: sentsibilizazio-ekimen nabarmenena eta laneratze-arloan Clece-rekin gehien kolaboratu duen elkartea
  • Errealitate horrekin zenbait arlotatik lotutako zazpi pertsonek osatu dute epaimahaia, zeinak presidente izango baitu, berriz ere, Luis Lorente zineko zuzendari eta gidoilaria
  • Hautagaitzek laneratzearekin eta enpleguarekin duten lotura izango da epaimahaiak balorazioa egiteko orduan izango duen irizpide nagusietako bat

 

Madril, 2018ko ekainaren 14a. Clece-ren proiektu soziala den Clece Social-ek Konpromiso Sarien IV. edizioa iragarri du. Sari horien bidez, ezagutza egiten zaie genero-indarkeriaren kontrako borrokan zenbait arlotatik nabarmendutako hainbat ekimeni, bereziki emakumezko biktimak laneratzearekin lotutakoei.

Madrileko Canal antzokietan gaur goizean egindako aurkezpenean, azaldu dute ezen, IV. edizio honetan, sariak emango zaizkiela irabazi-asmorik gabeko zenbait elkarte eta entitateri, zeinek aipatutako kolektiboarekin jarduten baitute egunean-egunean. Horrez gain, berriz sarituko da errealitate horren gainean informatzen eta sentsibilizatzen lagundu duten kazetarien kategoria. Berritasun gisa, aurten sari bat emango zaio arazo horri buruz kontzientziatzeko ahalmen handiena erakutsi duen sentsibilizazio-ekimen onenari, eta ezagutza egingo zaio genero-indarkeriaren biktimak laneratzen Clece-rekin gehien kolaboratu duen entitateari.

«Konpromiso Sariek agerian jartzen dute gizarteak gero eta sentsibilitate handiagoa duela genero-indarkeriaren arazo larri horren aurrean. Gure jardueragatik eta gure proiektu sozialagatik, Clece-n ezin dugu ezikusiarena egin, irtenbideak bilatzeko zereginean inplikatu beharra daukagu. Gure konpromisoa haziz joan da azken urteotan eta, gaur egun, 227 emakumezko biktimak lan egiten dute gurekin. Konpromiso Sariek bultzada nabarmena eman dute sentsibilizazioan eta kontratazioan. Esate baterako, iaz, sariak banatzeko ekitaldian, konpromiso gisa hartu genuen urte batean 139 emakume kontratatzea, entitate sozialen partetik jaso genuen hautagaitzen kopuru berbera. 87 lortu ditugu dagoeneko, erdiak baino gehiago», adierazi du José Andrés Elizagak, Clece-ren Komunikazioa eta Kanpo Harremanak arloko zuzendariak.

Aurten, aurkeztutako hautagaitzak baloratzeko orduan, epaimahaiak arreta berezia jarriko du enpleguan. «Laneratzean du Clece-k konpromiso-ahalmen handiena, eta, horrenbestez, hautagaitzak baloratzeko orduan, alor horretan egingo dugu indar handiagoa. Ahaztu gabe, jakina, enplegua beste kate-maila bat dela, agian azkenengoa, emakume horiek oneratze-bidean igaro behar duten prozesuan, harik eta bizitza berri bati ekin arte», azaldu du José Andrés Elizagak.

Sei sari lau kategoriatan

Konpromiso Sarien IV. edizioak sei sari emango ditu guztira, lau kategoriatan:

  • Proiektu Sozial Onenak, genero-indarkeriaren biktima diren emakumeak laneratzearekin lotutako irabazi-asmorik gabeko entitateentzat. Kategoria honetan, epaimahaiak hiru proiektu onenak sariztatuko ditu 10.000 euroko diru-hornidura batekin.
  • Genero-indarkeriarekin lotutako Kazetaritza Lan Onena. Kategoria honetan, epaimahaiak idatzizko prentsan egindako lan onenaren egilea hautatuko du, eta 7.000 euroko saria emango.
  • Genero-indarkeriarekin lotuta aurten gehien nabarmendutako Sentsibilizazio Ekimena. Kategoria honetan, golardo egiaztagarri bat emango zaio ekintza, kanpaina edo ikus-entzunezko programa bati, genero-indarkeriaren kontra egiteagatik eta/edo izurri horren gainean sentsibilizazio soziala sustatzeagatik.
  • Ezagutza berezia, genero-indarkeriaren biktimak laneratzen Clece-rekin gehien kolaboratu duen Elkarte edo Entitatearentzat, golardo egiaztagarri baten bidez.

Proiektu sozialak eta kazetaritza-lanak aurkezteko epea honezkero dago irekita, eta irailaren 14an amaituko da, 19:00etan. Hautagaitzak aurkeztearekin lotutako informazio guztia kontsultagai dago esteka honetan argitaratutako oinarrietan.

 

Adituen epaimahaia

Errealitate horrekin zenbait arlotatik loturako hainbat pertsonek osatuko dute epaimahaia, zeinak presidente izango baitu, berriz ere, Luis Lorente zineko zuzendari eta gidoilaria

«Neurria hartu behar zaio Sariok duten garrantzi erabakigarri eta bereziari, zeren Clece-ren egitekoa, estrategikoki, funtsezkoa baita berdintasunik ezaren kontrako borrokan; zehazki, haren adierazpen muturrenetako batean: genero-indarkeria».

Eran berean, honako hauek epaimahaikide jardungo dute aurten berriro ere: Genero Indarkeriarako Gobernuaren ordezkaria, María José Ordóñez; Generoko eta Etxeko Indarkeriaren kontrako Behatokiaren presidentea, Ángeles Carmona, eta Clece-ko presidentea, Cristóbal Valderas. Parte-hartzaile berrien artean arituko dira, IV. edizio honetan, Polizia Nazionalaren Familia eta Emakume Unitateen komisario nagusia, Santiago Carrasco, eta Radio5eko “Ellas pueden” irratsaioko zuzendari eta aurkezlea den Marta Pastor.

«Kide berri batek osatuko du epaimahaia, politikaren egunerokotasunak eta Gobernuaren izendapen berriek utzitako hutsunea betetzeko. Grande-Marlaska epailearen kasua da hori, Barne ministro baita orain. Denek bezala, joan den astean jakin dugu izendapenaren berri, eta, ondorioz, epaimahaia osatzeko zain gaude», esan du José Andrés Elizagak.

IV. Konpromiso Sarien oinarriak