Clece chega a un acordo coa Asociación para a Reciclaxe de Lámpadas para facilitar a recolleita selectiva de residuos nas súas instalacións.
O Grupo Clece asinou un convenio de colaboración coa Asociación para a Reciclaxe de Lámpadas (AMBILAMP) co obxectivo de implantar nas instalacións da propia empresa e naquelas que xestiona para os seus clientes un sistema de recolleita selectiva dos residuos de lámpadas que permita a súa entrega, recolleita e posterior tratamento.
Segundo o acordo, AMBILAMP habilitará un punto de depósito dos residuos de lámpadas nas propias instalacións do Grupo Clece e naquelas de clientes que se crea axeitado para facilitar a separación dos distintos tipos de lámpadas. Así mesmo, encargarase do seu traslado ata un espazo autorizado para procurar un tratamento respectuoso co medio natural.
Pola súa banda, o Grupo Clece comprométese a informar os usuarios das instalacións do novo mecanismo de xestión de residuos de lámpadas, sinalizar de forma adecuada a localización do punto de recolleita e avisar a AMBILAMP da necesidade de baleirar os contedores.
Ademais, o Grupo Clece colaborará nas campañas de información divulgativa e formación que AMBILAMP poida desenvolver, para dar a coñecer o sistema integrado de xestión de residuos de lámpadas e contribuír cunha xestión correcta dos refugallos que se traduza nun beneficio para o medio natural.